میں پلڑو جھل جھل پِندی ہاں میڈے دیس دے ویس دیاں خیراں کر​

میں پلڑو جھل جھل پِندی ہاں میڈے دیس دے ویس دیاں خیراں کر​

کر خیراں ڈھول سپاہی دیاں میڈے سِکدے دیس دیاں خیراں کر​

اوندے شر تکرار سلامت رکھ میڈے پیار اقلیس دیاں خیراں کر​

اونکوں طارق ہے پردیس پسند جیوے جند پردیس دیاں خیراں کر​

​

بہوں ڈُکھ ڈیندیں رب سُکھ ڈیوی ہتھ چا کھڑداں مجبور جو ہاں​

تیڈے رستے ڈو چن ہر ویلھے اکھ لا کھڑداں مجبور جو ہاں​

سُنڑ چنگا مندا بول تیڈا نیویں پا کھڑداں مجبور جو ہاں​

ڈے دھکے شاکر ٹور ڈیندیں ول آ کھڑداں مجبور جو ہاں​

ساڈے نین بُھلا سُکھ چین کھڑن اوندی شوخ شکل توں نئیں نکھتے​

تھے غرق ہن حسن دے نیناں وچ اوندے مست کجل توں نئیں نکھتے​

ساڈے ذہن پھسیے ہن وعدیاں وچ پل پل اجکل توں نئیں نکھتے​

جگ ارشد پُج گے چندر اُتے اساں زُلف دے ول توں نئیں نکھتے​

جیڑھا کم ہا یار رقیباں دا اوہو سجنڑ کریندے رہ گن​

جیکوں اپڑاں سمجھ کے حال ڈتم میڈی پاڑ پٹیندے رہ گن​

لا تیلی میڈی جھوپڑی کوح ہتھ پیر سکیندے رہ گن​

بس شاکر بدلے پانڑیں دے پٹرول سٹیندے رہ گن​

جو کر بیٹھیں سو کر بیٹھیں ہُنڑ ڈھیر سجنڑ دھر تال نہ کر​

کر ظلم تے بن مظلوم نہ بہہ ہک چال کنوں بئی چال نہ کر​

کیتا کیں برباد ہے شاکر کوں ہتھوں اُلٹا یار سوال نہ کر​

میڈی ہر حسرت دا قاتل ہیں تیڈی مرضی جُرم اقبال نہ کر​

جیڑھا فجریں توں لا دیگر تئیں اوندی تانگھ تنگھیندا رہ گے​

کوئی جھٹ کھن تھے انا للہ اوندی زندگی دا ڈینھ لہہ گے​

او قاصد نال تیار وی تھئے اے سوچ کے ولدا بہہ گے​

بھلا مر تاں ایہو شاکر گے، کیڑھا کوٹ دا کنگرا ڈھہہ گے​

​

دل من پوی تاں لنگھ آویں، میڈے گھر دا سوکھا راہ ہے
ہاں واسی دکھ دے صوبے دا، ضلع غم تحصیل جفا ہے
چند میل فراق دے موضع توں ہک ہنجواں دا دریا ہے
جداں شاکرؔ پرلی منڑ ٹپ سیں ، اتھاں ساہمنے میڈی جھاء ہے